Flokkum betur

Hvað á að flokka sem blandaður úrgangur?

Við erum orðin ansi vön því að flokka plast, pappa, pappír og matarleifar – en hvað á að fara í blandaða úrganginn?

Það á í rauninni sem minnst að fara í flokkinn blandaður úrgangur. Í þann flokk ætti bara að fara úrgangur sem ekki er hægt að flokka í annan viðeigandi úrgangsflokk og er því ekki endurvinnsluefni. Því betur sem við flokkum, því minna fer í blandaða úrgangsflokkinn.

Hvað má flokka sem blandaðan úrgang?

Í blandaðan úrgang fara meðal annars hlutir sem ekki eiga sér annan endurvinnslu- eða flokkunarfarveg í almennu heimilishaldi. Þar má nefna:

• Ryksugupoka og innihald þeirra
• Bleyjur og aðrar hreinlætisvörur
• Blautþurrkur
• Kattasand og sambærilegan úrgang
• Mjög óhreinar umbúðir sem ekki er hægt að tæma eða hreinsa
• Smáhluti úr blönduðum efnum sem ekki er hægt að aðskilja eða flokka með öðrum hætti

Hvað á ekki að fara í blandaðan úrgang?

Ýmis úrgangur ratar í flokkinn blandaður úrgangur sem væri hægt að flokka betur og koma þeim auðlindum aftur út í hringrásarhagkerfið. Þar á meðal eru pappír og pappi, plastumbúðir, matarleifar og aðrir flokkar sem hægt er að halda aðskildum.

Svo eru hlutir sem sérstaklega mikilvægt er að flokka aldrei  sem blandaðan úrgang.

• Rafhlöður geta valdið eldhættu þegar þær skemmast eða kremjast við söfnun og meðhöndlun úrgangs
• Raftæki
• Spilliefni á borð við málningu, leysiefni og ýmis sterk hreinsiefni. Slík efni þarf að fara með í næstu móttökustöð.
• Einnota og fjölnota rafrettur

Minna í blandað = betri nýting

Þess vegna er blandaði úrgangurinn í raun ágætis mælikvarði á flokkunina okkar 👉🏽 Því minna sem fer þangað, því betur erum við að flokka.