Orkan mun í júní bjóða uppá gáma fyrir garðaúrgang á fjórum stöðvum sínum á höfuðborgarsvæðinu. Verkefnið er unnið í samstarfi við Terra en með því vill Orkan einfalda fólki lífið. “Við viljum bjóða uppá þennan möguleika í nærumhverfinu og vonandi mun þetta mælast vel fyrir” segir Karen Rúnarsdóttir framkvæmdastjóri einstaklingssviðs Skeljungs.

Karen segir verkefnið samrýmast umhverfisstefnu félagsins vel "Við höfum verið að bjóða viðskiptavinum okkar að kolefnisjafna aksturinn sinn í samstarfi við Votlendissjóð. Næsta skref er að auðvelda flokkun og höldum við þannig áfram að axla samfélagslega ábyrgð og vinnum markvisst að því að minnka kolefnissporin.”

Við hjáTerra teljum þetta mjög mikilvægt og þarft verkefni. Þessi garðaúrgangur verður síðan jarðgerður og fólk fær síðan moltu hjá Orkunni í garðana sína á næsta ári. Fullkomin hringrás!

Gámarnir eru staðsettir á Suðurströnd, Seltjarnarnesi, við Kleppsveg og í Hraunbæ í Reykjavík og á Reykjavíkurvegi í Hafnarfirði og eru aðgengilegir allan sólarhringinn. Í gámana má einungis fara garðaúrgangur svo sem lauf, gras, greinar, illgresi, blómaafskurður og mold. Engir plastpokar mega fara í gámana.