- Fyrirtæki
- Heimili
- Um Terra
Flokkunarleiðbeiningar og losunardagatöl sveitarfélaga
Hvað svo?
Allur bylgjupappi, pappír og málmar sem við söfnum fer í endurvinnslu. Pappi og pappír er sendur úr landi til endurvinnslu. Málmar fara til endurvinnslufyrirtækja hér á landi.
Við sendum plastfilmuna til Hollands þar sem frekari flokkun fer fram og síðan endurvinnsla aftur í plastefni. Það eru síðan margir flokkar af öðru umbúðaplasti, t.d. plastpokum, smærri plastfilmu, plastbökkum, samsettri plastfilmu (t.d. áleggsbréf), skyrdósum, stórum og litlum plastflöskum og brúsum, sem við tökum saman í einn flokk. Þetta plast er núna sent til Þýskalands og Svíþjóðar þar sem það fer í nánari flokkun. Meirihluti af plastinu er endurunnið, en hluti þess er ekki nothæft til endurvinnslu, t.d. vegna óhreininda eða samsetningu umbúða. Það plast sem ekki er hæft til endurvinnslu, fer til orkuvinnslu. Þannig nýtist efnið til að búa til hita í stað annarra orkugjafa.
Spurt og svarað
Ef þú finnnur ekki svar við þinni spurningu, endilega sendu okkur fyrirspurn.
Hvernig flokkast lífplast?
Orðið lífplast er notað bæði yfir lífbrjótanlegt plast og plast sem brotnar ekki niður. Um 1/3 lífplasts sem er framleitt er lífbrjótanlegt en hitt er lífplast sem brotnar ekki niður. Lífbrjótanlegt lífplast sem brotnar niður í hefðbundnu jarðgerðarferli flokkast með öðrum lífrænum úrgangi.
Allt annað sem lítur út eins og plast á að flokka með öðru plasti. Ef þú ert hins vegar í vafa hvort að plastið brotni niður, ekki setja það í lífrænt heldur með öðru plasti, látum náttúruna njóta vafans.
Hvernig flokkast handþurrkur af salernum?
Allur úrgangur af salernum á að fara í almennt sorp. Handþurrkur af salernum eiga aldrei að flokkast með pappa.
Hvernig flokkast myndbandsspólur?
Ef um er að ræða lítið magn, þeas. einkasafn, þá er jú hægt að taka þessa hluti í sundur og ef hægt er að gera það nógu vel svo að það fari í einsleita efnisstrauma, s.s. hreint plast og hreina málma, þá má það fara þá leið. Það er því miður ekki til endurvinnsluferill fyrir segulbandið sjálft sem fer því með almennum úrgangi. Ef um er að ræða mikið magn, þá er hægt að hafa samband og við að skoðum það sérstaklega.
Hvernig flokkast einnota hanskar?
Einnota hanskar flokkast í almennt sorp
Má eldhúspappír / sérvettur fara með lífrænum úrgangi?
Já, matarsmitaður pappír má fara með lífrænu.
Hvernig flokkast bækur?
Innbundnar bækur með saumuðum kili eru erfiðar í venjulegri pappírs-endurvinnslu. Ef kjölurinn er límdur saman má bókin fara í endurvinnslu. Eins er hægt að rífa kjölinn af og setja blaðsíður í endurvinnslu- eða pappírstunnu. Annars fara innbundnar bækur í almennt sorp.
Þarf að þvo endurvinnsluefni?
Allt efni sem fer til endurvinnslu þarf að vera nokkuð hreint en ekki er nauðsynlegt að þurrka umbúðirnar. Oft á tíðum er um samsettar umbúðir að ræða og er þá gott að aðskilja efnin eins og mögulegt er t.d. að rífa plastflipa af drykkjarfernum og taka ál- eða pappafilmu af jógúrt- og skyrumbúðum og fleiri umbúðum áður en efnin eru sett í viðeigandi ílát.
Flokkast gluggaumslög sem pappír eða plast?
Gluggaumslög mega fara með pappír og óþarfi er að taka plastið af
Þarf að taka merkimiðana af plastumbúðunum sem flokkast með plasti?
Nei, það þarf ekki að taka merkimiðana af plastumbúðunum
Hvernig flokkast sprittkerti?
Tómir sprittkertabikarar flokkast í Endurvinnslutunnuna